बिहिबार , मंग्सिर २३, २०७८

चितवन ।

नेकपा ओली समूहका नेता एवं पूर्वमन्त्री महेश बस्नेतले आफ्नो राजनीतिक भविष्य जोगाउन पुष्पकमल दाहाल प्रचण्डले सूर्य चिन्हमा आँखा गाडेको बताएका छन् ।

भरतपुरमा बुधबार आयोजित ओली पक्षीय राष्ट्रिय युवा संघ नेपाल चितवनको जिल्ला कमिटी घोषणा, सपथ ग्रहण तथा प्रशिक्षण कार्यक्रममा बोल्दै नेता बस्नेतले पहिचान गुमाएका प्रचण्डले अब सूर्य चिन्हभन्दा बाहेकबाट निर्वाचन लड्दा नजित्ने निष्कर्ष निकालेर त्यसका लागि मरिहत्ते गरिरहेको बताए ।

‘हिजो सूर्य चिन्हबाट चुनाव लडौं भनेर सहमति गर्दा उहाँले नै पछाडि हटेर गोलाकारभित्रको हँसिया हथौडामा चुनाव लड्न जानु भो, त्यसले गर्दा १० लाख मत बदर भए,’ नेता बस्नेतले भने, ‘हिजो सूर्य चिन्हका उम्मेदवार सिध्याउने र सूर्यका मतपत्र च्यात्नेलाई आज किन त्यही सूर्य चिन्ह चाहिएको हो ? आगामी निर्वाचनमा सूर्य चिन्हविना प्रचण्ड र माधव कुमार नेपाललाई कुनै भोट प्राप्त हुन सक्दैन ।

त्यही माया हो प्रचण्डलाई सूर्य चिन्हको । काट्ने बेलाको खसी बोका र राँगालाई गरेको माया जस्तै हो । यो मायाबाट मुक्त हुनुहोस् ।’

प्रचण्ड–माधव नेपालले नेकपा फुटाए पनि त्यसको घोषणा गर्न नसकेको नेता बस्तेनले बताए । प्रचण्डले नेपालको कन्फर्टेबलको लागि नभई विदेशीको कन्फर्टेबलको लागि पार्टी विभाजन गराउन खोजेको पुष्टि उनका गतिविधि र अभिव्यक्तिले गरेको आरोप बस्नेतले लगाए ।

धोकेबाज प्रचण्डले कांग्रेसलाई पनि पटकपटक धोका दिएकाले शेरबहादुर देउवाको साथ नपाएको उनले तर्क गरे ।

‘पहिचान गुमाएका प्रचण्ड–माधव अब संसदमा कुन लाइनमा बस्नुहुन्छ ?,’ उनले प्रश्न गर्दे भने, ‘सत्तापक्षको लाइनमा बस्नुहुन्छ की प्रतिपक्ष अरु दलका लाइनमा ?’ कुनै पनि लाइनमा बस्न प्रचण्ड–माधवलाई राजनीतिक नैतिकताले नदिने बस्नतेको भनाइ छ । प्रचण्ड–माधवको पक्षमा नलाग्न नेकपा सांसदलाई आग्रह गर्दै नेता बस्नेतले ओलीकै लाइनमा बस्न आग्रह गरेका छन् ।

संसद खुलेपछि नेकपा ओली पक्ष झन् सशक्त भएर अगाडि बढ्ने बताउँदै उनले प्रचण्ड–माधवसँग अघि गुड्न गेयर नभएको बस्नेतको टिप्पणी छ ।

प्रतिक्रिया

सम्बन्धित खवर

ताजा समाचार

लोकप्रिय