काठमाडौं ।

प्रधानमन्त्री केपी शर्मा ओलीले जनता समाजवादी पार्टीको साथ पाएका छन् । उनले जसपाको कतिपय माग सम्बोधन गरेर साथमा ल्याएका हुन् ।

जसपाका नेता तथा कार्यकर्तामाथि लागेका कतिपय मुद्दा फिर्ता लिने निर्णय गरेर उनले औपचारिक सम्झौताको ढोका उघारेका छन् । १ सय २० जना जसपा नेता तथा कार्यकर्ताको मुद्दा फिर्ता भएको छ ।

जसपा अध्यक्ष महन्थ ठाकुरसँग पनि ओलीले आजै छलफल गरेका छन् । दुई नेताबीच सत्ता समिकरणबारे कुराकानी भएको बुझिएको छ ।

जसपासँग सरकारले बुँदागत रुपमा सम्झौता गर्ने तयारी समेत गरेको छ ।

जसमा नेता तथा कार्यकर्तामाथि लागेको बाँकी मुद्दा फिर्ता लिने, संविधान संशोधनका लागि अध्ययन कमिटी बनाउने, नागरिकतालगायत समस्या समाधान प्राथमिकतामा छन् ।

सम्झौता भएमा जसपा ओली सरकारमा सहभागी हुने बुझिएको छ ।

जसपा सरकारमा जाने तयारीसँगै प्रधानमन्त्री ओलीविरुद्ध बन्न लागेको समिकरण बन्न कठिन भएको छ ।

यसअघि काँग्रेस, माओवादी केन्द्र र जसपाबीच समिकरण बनाएर ओलीलाई हटाउने तयारी भएको थियो । जसपाले साथ नदिँदा काँग्रेस अगाडि बढ्न सकेन ।

जसपा ओली सरकारलाई साथ दिन पुगेपछि सत्ता संकट पनि टर्ने सम्भावना बलियो भएको छ ।

अब प्रधानमन्त्री ओलीलाई माओवादी केन्द्रले दिइआएको समर्थन फिर्ता लिने निश्चितप्रायः छ । केही दिनभित्रै प्रचण्डले यसबारे निर्णय लिने बुझिएको छ ।

माओवादीले समर्थन फिर्ता लिएमा ३० दिनभित्र प्रधानमन्त्री ओलीले विश्वासको मत लिनुपर्ने हुन्छ ।

विश्वासको मत लिन नसके नयाँ सरकार गठनको ढोका खुल्नेछ । त्यो पनि सम्भव नभए देश मध्यावधि चुनावमा जानसक्छ ।

रिपोटर्स नेपाल

प्रतिक्रिया

सम्बन्धित खवर