चितवन — चितवनको भरतपुर महानगरपालिका–१ ठिमुरा र तनहुँको देवघाट जोड्ने त्रिशुली नदीमाथि बन्दै गरेको मोटर गुड्ने पुल पुनः भत्कँदा काम गर्दै गरेका एक मजदुर र दुई जना नदीमा बेपत्ता भएका छन् ।

चितवन जिल्ला प्रहरी कार्यालयले दिएको जानकारी अनुसार बिहान साढे ९ बजेतिर फर्मा खोल्दै गरेका १० जना मजदुरहरु त्रिशुलीमा बगेका थिए ।

नदीमाथि मोटर गुड्ने पुल बनाउन ७१ साल कात्तिकमा सम्झौता भएको थियो । तर बनेर नसकिदै गएको चैत २४ गते राति अचानक त्यो पुल कामै नलाग्ने गरेर भत्केको थियो ।

सम्झौता अनुसार ७४ सालको कात्तिकमै पुल बनाउने काम पुरा हुनुपर्दथ्यो । तर पटकपटक गरेर चार पटक म्याद थपे पनि बन्न बाँकी रहँदै पुल कामै नलाग्ने गरेर भत्केको थियो । पुल दुई सय मिटर लम्बाइको छ । कंक्रिटका ४०/४० मिटरका तीनवटा र स्टीलको एउटा ८० मिटरको स्पान पुलमा रहन्छ । चैतमा कंक्रिटको स्पान भत्केको थियो । यो पटक स्टीलको स्पान पनि भत्केको हो ।